Каректе калган күз

Айылдагы таш төшөлгөн көчөгө

Жалбырактар калаар эле төгүлүп.

Кызыл, сары боёкторду сүртүнчү

Жайды-жайлай өскөн чөптөр өрүлүп.

Калчу бир күн бакалар да чардабай,

Кумурскалар жер астынан чыгышпай,

Мурдагыдай тал-теректер куштардын

Жан жыргатып сайраганын угушпай.

Байрак мисал турар эле желбиреп

Ак булуттар чокуларга оролгон.

Оюн салып, шамал менен жарышчу

Жылкылардын кулундары торолгон.

Аңыз жыттуу талааасында колхоздун,

Саман-топон жатаар эле чачылып.

Ойноп жүрсөк кампачынын аялы

Буудай кууруп берээр эле чакырып.

Чыныбай Турсунбеков